Assalamualaikum.

Bejupa lagi kita. Banyak sunggoh kegheja ambo lani. Tambah-tambah kalu dah jadi suri rumah, kalu cukok bulaeng nyae dapat jawatan sementagha lae. Muma nak tahu jawataeng apa? Tak lhing tak bukaeng jawatan Akauntan la kata oghang lani....heh...heh...heh.... Takpa lae kok di? Mengaji tak tinging macaeng ambo pong buleh pegang jawataeng tu, akauntan rumah tangga!

Tu belong lagi jawataeng Guru Besar. Kalu anak-anak dok wat kegheja sekolah kae, ambo pong sama nheik selak buku dema, bukaeng nyae gheti haraeng cabok pong, tapi cek tetaek kena cek, budak lani, kena dok tengok sokmo, kok lae mana thu ada buah jeghing keduak kae dalaeng beg sekolah dema, kita kena tengok dih. Bukaeng nyae tak pecaya tapi kena dok peghati lae sokmo.

Haghi ni ambo tak thu nak begebang apa dengan muma, ambo ingat lani kaeng bulaeng Syaaban, jadi ambo nak kelik zaman dulu-dulu, zamaeng ambo kecik-kecik dulu, bulaeng posa.
Seghenok ooo..... kalu ingat dulu-dulu! Pulak tu haghi ni ceghah jae, oghang hat dok lalu kok jalaeng depaeng ghumah ambo, ambo ghasa dah macaeng bulan posa dah!


Dulu, kalu nak posa jae, oghang kapong Anak Kugho kata, megang posa, oghang kapong ambo pong semeleh lemung keghebo lae gak. Habuan nak bakit besao (bersahur) deh! Ikaeng2 maseng dah tak lalu dah. Oghang kedey pong dekaek2 bulaeng posa dema tak oda (order) dah hat hat makanaeng macaeng tu. Tak laku. Hat dok ada dalaeng kedey dema, selalu pong ikan temenung lengat, ghoti menggali selaing ikan idok (ikan basah). Ghoti keghing pong kalu dok ada baki, ummmh... pakey hapak gitu lae.

Haghi petama posa, kapong ambo, kalu pagi, sunying jae sapey lae ke tengahghi. Kho ke petang kae, khor dok meghiah dah lae. Lapaeh tu pulak kho petang lagi ada lae budak-budak kapong kayoh besika (basikal) juae ai batu. Dema ambik nu.... pekaeng Batu Kugho nu! Jhoh lae juga, budak-budak ni pakat dok kayoh besika ni ambil keto aih ni jual seketo sekupang jae. Tapi kae, dema ni ghajeng sunggoh, nak caghi duek ghaya la e sama tu. Keto aih ni pulah kalu hat kecik lima duek. Tu pong buleh kosi makaeng satu klorga.


' ... Aih......aih.....!. Dok denga lagi sogha dema. Hat selalu dok juae ni muma nak tahu dak sapa. Mat Ribi dengan Mat Kulat lae. Dema ni letak keto aih dalam kota kayu belakang besika , oghang kata di plata (pelantar). Dema nheik besika jatan, kalu besika tina plata dia kecik. Muma nak thu besika jatan ni macaeng mana, tu lae.... hat ada sik galang tu! Oghang lani kata basikal tua..heh..heh..heh..... Ingat pulak ambo kat Sudirman!(Al-Fatihah buat beliau)

Keto aih ni pulak, dema gaji (gergaji) bagi jadi keto2 hat kecik, lepaeh tu dema seghibe2 lae pulak dengan habok kayu. Kalu tak buat macaeng tu, keto aih ni cepat cair. Kalu ambo beli, mak ambo sughoh cako (cangkul) tanah, buaek lubang nak taghoh keto aih ni! Tahaeng lae sikik. Tengok! oghang dulu, idea sikik panya bagoh kae!

Dekaek mengarek kae, pakaek dok keliling talaeng lae, tak saba nak tungung masa nak bukak posa. Bukaeng nye ada makanan mewah macaeng lani, tapi dulu kalu ada guley sikik pong ek tak kigha dah! Aih jangaeng nak lupa pulak, mak ambo kata ' bacoh (bancuh) air serbat (sirap).Huiii! lazatnyae tak tekata lae! Bunying je kalok di semejek, tu kae salah kena tonggang aih, kadang tu, bejalan pong ghasa bekocah peghok paksae minung aih banyak sangat. 'Ikok lae napsu sangat!' Mak ambo maghah.

Lepaeh mengarek, mak ambo pong keghah sughoh besiap nak gi semejek pulak dah. Hui...dah lae mengah tak habih lagi, maghah juga dalaeng hati nu....! Gi semejek semayang sunah tarawih satu bab lae pulak. Lani moreh di buat ikok gruk (group) dulu tiap malaeng ada moreh, tapi kalu oghang tanya makaeng apa malaeng ni, dema jawaek lae, ghumah batu...kah...kah...kah!
Muma thu ghumah batu tu apa? Tetu lae ghoti menggali cicah dengaeng ai gula meghah.....
Hat tukang dok ghoyat tetang makaeng ni, sapa lagi kalu bukaeng mat ribi, kaengkae ghumah dia dekat semejek!

Selalu lae pong, dulu-dulu bulaeng posa ni tekena masa cuti sekolah. Jadi budak-budak kapong pong dah nak makaeng tak buleh, dok kigha meghiok (merayau) lae. Ada yang gi betimbok sapey meghah bute mata, ada hat maing goli kae, maing gasing kae maing aci kae. Bab maing aci ni, ambo paling seghenok kalu maing aci menusuk (menyorok). Seghenok sapey tak thu nak ceghita lae!

Nak bakit besao (bersahur) satu masalah juga. Punya lae sayang tido, ghasa baley lae kalu tak bakit pong. Mak ambo selalu pujuk bakit lae, nak pahala lebih kena bakit makaeng sikik..tu yang mak ambo kata. Sedeh bila ingat mak ambo. beliau dah meninggalkan ambo semasa beliau beromo 86 tahun (Al Fatihah buat mak yang sangat ambo kasihi) Loni ambo pulak lae gati mak ambo dok geghak anak ambo hat tak mboh bakit tido!

Dulu besao, oghang katok kalok. Lani tak dak dah. Maing bunying jaeng loceng jae lae. Kring...kring loceng dok bunying,tak bakik bakik juga. Ohhhh.... lupa ambo, bukaeng jaeng loceng lagi, handphone pulak dah!


Sebulaeng posa, ghasa tak ghok jae. Tengok oghang pong ghasa nak makaeng. Dulu tak dak dok bejuae macaeng lani. Dok kena masak kedighi lae. Petang jae, asaek bekelong jae tiaek(tiap) ghumah. Kalu tengahaghi asaek bekelong...haa... tu jaga tu... mesti ada hat tak kena tuh !
Petang ambo tukang gi hata (hantar) makanan ke ghumah adik beghadek. hAt dekaek2 je lae.
Mak ambo ghajeng masak. Kadang tu mak ambo buaek buah melaka, cuco kodok, bubo kae, atau paling tidak pong hat ambo paling tak bekenaeng, piza! Muma thu dak piza mak ambo macaeng mana? Tu lae resepi dia kalu tak dak modae. Pokok getah basah de, tak leh nak motong! mak ambo buat resepi tu lae. Piza tu mak ambo buaek macaeng ni. Mula-mula mak ambo kuko (kukor) nyo, lepaeh tu capo dengaeng tepong gandong, gula sikik, tepek lae dalaeng koli. ha... tu lae piza dulu-dulu heh...heh...heh...!

Uiih! Dah puko tujoh dah kae, weei... ambo dok meghipuk tak seda dih! Ambo begeti di sini lae, ada masa mingung depaeng ambo sambung kelek di! Nih... bukaeng apa nak setereka baju sekolah anak lagi.... tu yang ambo kena begheti tu, kalu ikot hati..nak lagi ceghita gyoyat dengan muma. Ambo begheti dih. Assalamualaikum. Jupa kita mingung depaeng!