ShareThis

Isnin, 19 Oktober 2009

Kenoghi loni.......

Assalamualaikum.

Petang-petang lagu ni ambo tak thu nak wat apa. nak jighuh pokok bunga, hujaeng tughong selalu dah, sapey ghumah ambo banjey sokmo. Nak bagi ayaeng ambo makaeng, anak-anak ambo dah ambik aleh tugaeh tuh! Apa ambo nak wat nih? Tu lae.... bila anak-anak kho dok besa, dengan senighi nya ambo pong jadi besa gak! heh...heh...heh....!

Jong kita denga ghoyaek ceghita kenoghi nak? Haek sebelong-senelong ni ambo ghoyaek kenoghi dulu-dulu. Haghi ni ambo nak begebang haek kenoghi loni pula. Haek kenoghi zamaeng modeng lae.Kenoghi haek senang tapi modael pong buleh tahaeng gak! Walo apapong, esok-esok nung, ambo ghasa, kalu anak-anak ambo sapey jodo pong, ambo kena ikok buat kenoghi lagu loni lae jugak. Beghapa keghaek sangat haek nak maghi begotong ghoyong? Beto dak?

Kenoghi haek loni ada lagi haek begotong ghoyong, teghutamanya haek nak menyiang seghe lekuaeh, koyak ubi gatang (kentang) kae, ghichih bawang kae daeng haek laing-laing lae.Bab masak memasak ni seghah lae kat tukang masak-tukang masakdan oghang-oghang dia.Yang heghannya, oghang dok highih daging, dema dah tomih bawang ghepah, buleh masak pa!

Di kapong ambo kawasan batu Kugho nih, oghang semeleh lemung keghebo pagi-pagi, lebih kughang puko tujoh gitu. Tapi, puko 11 dah buleh makaeng dah, Tu wat ambo tabek stei tuh!
Oghang kapong ambo kata kalu lagu tu, kecang (ganti kata pada perbuatan yang cepat dan tangkas)

Tapi loni ni, tak beghakek beghidang dah, memang lae payah dah nak bejupa. Sokmo pong kalu tanya oghang kata 'dema buat kenoghi bufe (layan diri lae) !' Dikapong ambo, bila mula-mula buat cagha tu, ghame lae gak dok komeng, malu lae nak makaeng, maghi haek bawak anak ghame payah nak ambik makaeng lae, macaeng mitak sedekah lae! Tu dulu ! loni dak dah, semuanya dah buleh teghima, ya lae apapong kalu ada perubahaeng mesti lae ada komeng-komeng dan kritik. Haek dema dok komeng dulu pong, tengok loni buat kenoghi cagha tu lae gak!


Memang lae senang sunggoh cagha bufe ni. Gi ambik pinggaeng, ambik lauk haek kita nak, gi makaeng. Dok di jukey pong buleh lagi makaeng. tak payah nak melanguk lama-lama nak tungung oghang dok beghakik. Beto dak? Tapi yang lecenya kalu ada oghang haek dok tungung buboh lauk, haek tu memang lae sekali sekala, ghasa macaeng mitak sedekah.
heh...heh...heh...sekali sekala jey, tapi oghang semua macaeng tu jugak kaeng?

Pengateng loni pong, kalu dok besandeng, tak dak dah haek nak pejaeng mata (heh..heh...heh.. ingat dulu-dulu!) Siaek dema ni balaeh-balaeh senyung lagi! Tu lae oghang loni, kata oghang dema dah kenae lama, dah kenae sebelong mak pak kenae lagi. Kadang tu dema yang meghacang semuanya, daghi hantaraeng beghapa puloh ghibu, nak bawak beghapa bekaeh, pakaeyan lagu mana, tu semua dema dok ghacang, mak pak tahu teghima saja!

Jaghang nak ada silaek gayong macaeng dulu-dulu, apalagi ghazal pati pong dah bekubo, di kapong ambo loni dok ada lagi lae kumpulan ghazal, cumanyae dema nyanyi lagu-lagu nasik (nasyid) dan main alat-alat muzik yang sederhana. Tak dak dah haek nak menaghi begecok macaeng dulu-dulu.

Ho lae! dulu dengaeng loni banyak sunggoh bezanya. Ambo haek lahey pada zaman 60an memangla ghasa beghutong paksae buleh napak daeng meghasai 2 zaman daeng 2 fasa yang berbeza ni. Kadang tu ambo suka gak dok ghoyaek kat anak-anak ambo. Dema denga sapey tenganga daeng macaeng tak beghapa pecaya.

Dah dekaek mengarek dah ni, ambo begheti lae dulu dih! laing kali kita berborak ceghita haek laing pulak dih! Assalamualaikum. Moga kita semua dilindungi oleh Allah dalam keadaan selamat dan sihat. Ambo tengok tv ,di negagha laing, macaeng2 belaku. Kesian dan sedeh lae pulak.

Sabtu, 17 Oktober 2009

Kenoghi Dulu-dulu (bahagian 2)

Assalamualaikum.

Ambo bakik daghi tido tengahaghi. Badaeng lengoh-lengoh. Sakik pinggang lae pulak maklong saja omo pong dok semaking menikaet. Ingat dalaeng ambo punya hati, apa lae ambo nak buat haghi nih? Oooooo! Baghu ambo ingaek, dah lama ambo tak begebang dengaeng muma. Muma sehaek kae!

Nih! ambo nak sambong ambo punya ceghita haek dulu tuh! Dulu-dulu oghang besanding petang-petang. Kighanyae puko pat ke ataeh lae. Kighanyae lepaeh Asar lae. Oghang loni ni panggey Mak Andam kan? Tapi oghang kapong ambo dulu panggey Tok Tukang. Tok Tukang nih selalunya omo dah tua gak! Tapi dema ni lae, ilmu penoh di dada. Haek dok nak penaik seghi, dema ni lae, tapi sunggoh lae pong, pengateng dulu-dulu haek ambo peghasaeng memang beseghi, kadang tu sapey sebulaeng dok molek lagi!

Ambo ingaek, dulu kalu masa nak besandeng, haek jatang maghi, besandeng di laman ghumah lae. Pengateng tina pong tughong sekali dok sandeng. Besilaek begayong sakaeng lae dulu, di depaeng pengateng dema boh talaeng ada ko ghaya tutok dengaeng tudong, Bila oghang buka jey, beghebok lae bebudak gi ambik ko tu. Meghiah lae.

Lepaeh tu wak naik ataeh ghumah....ha..kalu muma nak tahu, pengateng tina ni wajik kena pakey spek mata. Satu haghi tu, ambo ingaek lagi, paksae tak dak spek mata hitaeng, Tok tukang tu pakeykan spek mata dia kaek pengateng tina tuh, tepisat-pisat lae ambo tengok pengateng tu, maklong saja, pakey spek Tok Tukang haek beli di Pekan Lasa, pawa (power) tebae gitu. Kalu ambo ingaek sapey lani ambo gelak. Tu belong lagi haek kena asah gigi! hi..... ghasa seghiu (seriau) bila ambo ingaek!

Kalu menyambok metah, esok ni kenoghi belah jatan pulak. Tapi kalu menyambok masak tungung lae semingung pulak. Kalu belah oghang jatan, tak beysa denga kenoghi besa. Ala-ala kada jey la. Tak macaeng anak tina. Gitu pulak dih? Tapi tu lae kenoghi dulu-dulu dan takdak proteh (protes) daghi anak jatan pong. Dah peseng tu dih!

Ambo begheti lae dulu dih, asar dah masok, ambo gi semayang dulu. Kita jupa lae bila-bila masa daghi loni. Daaa....! Assalamualaikum.

Khamis, 8 Oktober 2009

Kenoghi Dulu-Dulu (bahagian 1)

Assalamualaikum.

Bejupa kita malaeng ni. Ghasa-ghasa ambo tak dak keja malaeng ni, ambo ghasa nak ceghita ghoyaek kat muma lae kesah dulu-dulu. Nostalgia dulu-dulu sokmo dok tebayang di mata dan dok maing-maing dalaeng ambo punya hati. Anak-anak pong dok selalu mitak ambo ghoyaek, ni lae ambo nak ghoyaek ni.......!

Bila lepaeh ghaya, oghang dok maghi madah (oghang kapong ambo kata peseng tu untuk gati kata menjemput!) kenoghi selang semingung, ambo ingaek lae kelik kenoghi dulu-dulu.....!
Muma haek muda2 tetu tak beghapa caya, macaeng anak2 ambo, dema kata kaek ambo..' weeiii.. beto kae mak ?' Uhh...oghang tua 40an macaeng ambo ni memang banyak lae memori peseng2 tu! Ambo kaeng kae lahey zamaeng pop yeh yeh!


Ambo ingaek lagi, dulu kalu nak wat kenoghi kae, dalaeng masa sebulaeng tu dok sebok dah dok begotong ghoyong. Belong-belong tu, adek beghadek haek dekaek, maghi dah tulong menumbok padi. Haek oghang senang sikik bawa padi gi kelang, kelang padi masa tu, di Kapong Peghak ada sebutey, di Kapong Titi Kasey ada sebutey. Lepaeh tu, pakaek2 lae dok maghi pilih hatah(antah) padi. Semingung sebelong kenoghi, kami panggey menyipaeng, maghi lae ghame-ghame adek beghadek kompuak suma dok begotong ghoyong gi tebang buluh, habuan nak buat tangga dengaeng jemoghaeng. Bukaeng ada kemah macaeng loni. Makaeng dalaeng ghumah kae, kok ataeh baley kae.Tu jey lae!


Ambo ingaek masa Kak Mah ambo menikah dulu, dema oghang kapong maghi malaeng2 tulong jahik hataek ghembia, kami bukaeng dok bejamung apapong, takat buat bubo kacang jey.Tapi, tu lae oghang dulu-dulu, sikaek gotong ghoyong sangaet tebael. Bedegho jey oghang dulu-dulu!


Kenoghi dulu, semeleh lemung seko pong ghasa hebaek dah, kalu semeleh keghebo kae, tu nama nya oghang kaya lae. Kalu dalaeng ghumah ada laepulak sokghang oghang tina jaga tey kae, susu kae.Kita buat macaeng loteng ataeh halang ghumah, dema jaga di situ lae, muma haek muda2 nih tetu tak beghapa tahu atopong tak beysa denga dan tengok, ni kesah tahong2 60an dan 70an dulu.... Kalu tak cukok tey kae, kopi kae, susu kae,ghokok sekerek kae, suma nye mitak kaek penjaga ni lae...heh...heh...heh..

Dulu-dulu, masak suma gotong ghoyong. Bab pinggaeng makok, kutek kutek hipong daghi oghang2 kapong, tapi kena lae tulih jumlahnye, takok tak cukok masa nak bagi kelik esok nuh..
Yang selalu basoh pinggaeng tetu lae Cha. Ada ke dak lagi Cha ni, lama dah ambo tak tengok dia!

Tetamu pulak tu, tak bagi duek, tapi dema bawak sia(mangkok atau bekas selalunya di beli daghi Mekah) Dalam sia tu lae dema boh gula kae beghaeh kae. Tu lae oghang dulu-dulu! Di sia tu pula tuaeng2 punya ni ikaek lae dengan kahing(kain) warni warna haek dema caeng(cam) paksae masa kelik satgi adalae habuan dema. Selalunya ada sokghang dok di bawah ghumah tukang boh nasik dengan guley dalaeng sia tuh! Sokmo pong guley tu sudah tetu guley kambing capo dengaeng kacang panjang. Tu pong, kalu ambo tak gi kenoghi, sia tu lae haek ambo dok tungung-tungung.

Panjang bejela dah ambo ghoyaek, ambo begheti di sini dulu lae dih, ni baghu part 1, part 2 nati ambo ghoyaek lagi, Nih ambo begheti nak tengok derama pulak. Lhing kali kita gebang lagi dih! Assalamualaikum.

Khamis, 1 Oktober 2009

Kesah Lepaeh Ghaya

Assalamualaikum.

Lama sunggoh kita tak bejupa. Apa haba suma? Ambo haraek suma muma dok dalaeng sehaek dan bahagia dengan klorga suma. Baley gi lae kalu duek takdak pong, asae hati di dalaeng seghenok sokmo dih!

Ghaya dah nak masok dua mingung gi dah, kita haek dok ada ni, segheba maklong lae ada haek dok posa lagi, tak kigha lae haek wajik kae haek sunat kae, suma pakaek2 caghi pahala dih! Jangaeng dok posa makaeng minung je sudahlae dih? Haek lhing2 pong kita kena dok ambik kigha gak dih!

Ambo pecaya, ko ghaya kita dah tinggae seghedak dah, haek sipaeng ko dalaeng ting, tetu dok hakok ting, seghedak pong seghedak lae, janying ada ghasa ko ghaya. Kalu sebelong2 ni kita pakaek dok milih ko, haek ko tak beghapa sedaek kita tolak tepi, loni tak kigha apa dah, janying ko, sumanya kita ghadak belaka. Beto dak haek ambo dok kata ni?

Budak-budak pong, kalu dulu ko baka paling dema tak mboh, loni dema pandey lae dok keghutih makaeng ko tu. Buah hulu haek dah keghaeh keghejong pong, kho dok laku lae. Pakat suma dok kemaghok dah. Tu lae bahana lepaeh ghaya dih.

Haek tagha-tagha ambo kae atau yang sewaktu ngan ambo atau gak haek muda-muda sikik daghi ambo, loni kalu tak beghingaek waktu sambot ghaya, kho pakaek dok melengung lae gak.
Ya lae.... modae banyak yang habih! Tapi ambo ghasa, loni, ghame dah haek dok beghingaek haghi lepaeh ghaya dih! bagoh...bagoh.... macaeng tu lae kita, jangaeng ikok napsu sangaek.

Lepaeh ghaya, ambo ghasa nak makaeng lemang pulak dah. Gi tanya kaek Pak Da kok-kok dia nak buat, muma tahu dia kata apa? Weiii.... baka lemang haghi tu pong demaeng tak kebah lagi, chu nak makaeng pulak? Ambo sengeh jey lae. Ho lae tak kata ke dia lae, haghi megang ghaya tu, hujaeng tughong lebaek sunggoh, ghumah ambo haek tanah ghendah ni, banjey (banjir), hua....hua.... ambo ghasa nak teghiak paksae menyapuh pagi , petang sapah penoh di lamaeng!
tapi, Alhamdulillah, ambo seda tu kaeng suma daghi Allah, ada lae tu kelebihaengnya. Ihh..ihh...ihhh... mujo lae lemang haek ambo tepah tu tak metah, masak molek jey!

Ghumah ambo pong, lepaeh ghaya, sunying kelik lae, ho lae, suma dema pakaek kelik ghumah dema lae. Cuma kalu lepaeh ghaya, ghamey lae oghang buaek kenoghi, tak kigha lae kenoghi apa pong. Kenoghi kekah (aqiqah) kae, kenoghi menikah kae, betunang, naik ndo (naik buai) daeng macaeng2 kenoghi. Bukaeng apa , dema ambik peluang, adek beghadek ghamey haek kelik kapong, tua lae dema buat kenoghi, jadi adek beghadek buleh makaeng kenoghi.

Loni, di kapong ambo, ada gak haek buaek ghumah tebukak, tu pong sebutey dua ghumah gitu jey lae. Kigha oghang kapong ambo dah tak mboh ketinggalaeng dah lae! Ambo, dema panggey ambo gi, tak ghok nak makaeng deh, makanaeng banyak, sapey tebuang2. makmurnya Malaysiaku...heh...heh...heh!

Oppss.... dah lama ambo dok beghoyaek dengaeng muma, Haghi Saektu ni ada kenogi lagi, selang semingung kenoghi lagi. Tak beghapa beghani ambo nak makaeng banyak daging, takok naik daghah pulak. Tak dak lae ambo ni sakik lagi... takok...takok... oghang kata baley lae cegah dulu daghi mengubati kan?

Sekian, daghi ambo haghi ni, kalu ambo ghajeng, lusa kita gebang lagi. Assalamualaikum.
Related Posts Plugin for WordPress, Blogger...