ShareThis

Ahad, 13 September 2009

Ghumah Tebukak

Assalamualaikum.

Apa haba suma? ambo haghaek sehat sokmo dih! Ghaya nak kho dekaek, muma tak ghacang nak wat ghumah tebukak kae tekatok kae? heh....heh...heh...!

Kengkawaeng dok tanya kat ambo:

Mu tak wat ghumah tebukak kae?

Kak Min tak wat ghumah tebukak kae, kami ghasa nak gi?

Chu! wat lae ghumah tebukak, macaeng oghang lani!

Dek Mah! Oghang dok wat ghumah tebukak, mu tak ghasa nak wat kae?

Tu lae soalaeng2 haek dema dok tanya ambo, bila ghaya kho dok dekaek. Pening gak pala hotak dok pikey soalaeng haek lagu tu. Laeh-Laeh (last-last) ambo kata lagu ni:

Ambo ni kaeng ke oghang kapong, dok di kapong, ghumah ambo siang malaeng tebukak, muma maghi jey bila pong, ambo tungung dan sambot dengaeng penoh mesegha dan gumbira!
Kita oghang kapong, tetamu haek dok maghi bila pong kita layaeng, dema sapey pagi, kita bejamung cagha pagi, dema sapey tengahaghi, kita bejamung nasik, dema sapey petang kita bejamung lae cagha makaeng petang. Dak gitu?

Ghaya di kapong, kita semawa dema macaeng tu jey, tak payah nak madah yok ya yok ya, adek beghadek suma, kompuak tu belaka, nye mangi dengan iklaeh hati. Beto dak? Muma haek asae daghi kapong tetu ghasa macaeng tu kaeng?

Ambo tiggae muma la dih! Ambo nak gi ke dapo, ghasa nak gogheng kacang, kok-kok nak mula wat ko. Jadi kae dak tak thu lae lagi. Ambo ni kalu tak ghok pakey tak jadi la ko ambo tu haghi nih!
'SELAMAT HAGHI GHAYA' Kok kalu sudi, maghi lae ghumah ambo.....heh....heh...heh........
Wasallam. Daaaaa......!

Jumaat, 11 September 2009

Ghaya oooo ghaya (bahagian kedua)

Assalamualaikum.

'SELAMAT HARI RAYA
MAAF ZAHIR DAN BATIN' kepada semua muslimin muslimat dimana juga berada.

22 Ramadhan 1430. Dah 22 haghi dah kita dok posa, bermakna lagi lapaeng haghi lagi lae kita nak ghaya. Pikey bab ghaya ambo seghenok ada paksae kita akan meraikan kemenangan kita, tapi susah hati pong ada paksae muma thu lae kalu nak ghaya tu, pesiapaeng haek nak ghaya tu lebih lagi daghi amalaeng.....!Temasok lae juga ambo!

Kigha dok kigha, pikey dok pikey, apa pong ambo tak buat lagi. Ghaya dah nak dekaek, ko sebutey haraeng pong tak dak lagi. Haghu sunggoh! Oghang tina macaeng tu lae. Awae-awae posa ambo sokmo pong dah gi cuci kubo mak ayah ambo. Kadang gi sokghang, somo ambo gi ngan anak ambo lae. Tu pekagha wajik pada ambo!

Ambo baek nak tuka kheing lasey (kain langsir) ka(oghang kapong ambo panggey kaheng tutok tikaek) tak gadoh. Pakey haek mana ada jey. Sokmo pong ambo tak beysa deh nak tuka kheing lasey tiaek tahong. Sokmo pong ambo basoh jey, molek supa tu lae. Macaeng tu la gak dengaeng bunga haek dok hiaeh kok ataeh lemari kae ataeh meja kae., ambo celok dengaeng kelorok, ummmm... molek kelik lae. Jimaek deh!

Ghaya loni, kalu nak tepah baju, 3 bulaeng belong posa tu kita kena dok gi caghi tela (tailor) dah. Jangan dok mukat nak gi tepah dekaek nak ghaya, jangaeng dok sekeleng buaek macaeng tuh! Naya jey! Dema tak mboh layaeng deh, haraeng cabok tak nye nak ambik deh!

Di semejek pong, oghang tina kho dok luak lae, saf kho dok gheda lae. paksae dema pakat nak buat ko ghaya. Ambo kalu buah hulu kae, ko baka kae, tepah jey. Tak gheti deh nak buat. Ambo buat haek senang-senang jey, ko seperek ka, taek nanaeh (tart nanas) ka, macaeng-macaeng ko modeng lae, paksae haek tu senang sikik. Dodo lani pong payah dah nak bejupa. Halua maskat ka lama dah ambo tak napak. Ambo tak beghapa suka ko-ko ni, paksae manih sangat! Nyah Tong ambo pandey la buat ko-ko nih!

Anak ambo haek tina, dok loghaek dah, bila nak buaek ko....bila nak buaek ko? Nati lae dulu! ambo kata. Pekakaeh nak buaek ko pong tak dak lagi. Bila nak gi beli tak thu lae ambo. Duek pong tak dak lagi. Haghu bighu jugak nih!

Sokmo pong ambo buaek senighi jey ko-ko tu. Nak beli mahae gak ghasa. Paksae modae tak beghapa nak cukok deh. Kalu duek banyak haghoh oda jey! heh...heh....heh....! Adek beghadek ambo ghame, dema nak kelik kemana lagi, kalu tak kelik ke ghumah ambo. Seghenok oooo bila ghaya, paksae taing-taing (time) ni lae kita dok bekupo (berkumpul) adek beghadek. Meghiah oooo! Tu lae ko kena buaek gak!

Bila dok jadi lagu ni, ghasa nak jadi budak kelik lae. Tak loghaek nak pikey buat ko kae, nak tepah baju ghaya kae! Tu belong lagi nak tepah lemang, baek lemang ambo memang tak gheti buaek. Makaeng numbo satu! Lemang ni ambo sokmo tepah kaek Pak Da (laki Mah Dokbek)
ka, Mak Lang Munah ka (bini arwah Pak Long Li Cheduh)

Tu belong masok baek cuci ghumah lagi. Ambo ni kae dok di kapong. Keliling ghumah penoh pokok, tu kae daong penoh kok lamaeng ghumah. Mana nak buaek haek dalaeng ghumah, mana nak hambaek kok lua ghumah. Mujo lae jugak hasban ambo ngan anak jatan ambo ghajeng, buleh lae juga tulong menyapuh sapah. Sumanya ghasa nak bagi molek!Heh....heh...heh.....

Satu peghange ambo, dalaeng ghumah ambo suka sangat bunga hidok. Tu ka...salah kena usong pokok bunga tu, nak letak ceghok mana, sokmo tok laki maghah paksae dia kata...ha...buaek la saghang nyamok! Tapi ambo buat telinga tebae lae paksae suka deh!

Malaeng ghaya, daghi dulu sapey lani ambo suka pasang pelita, huii...indahnya suasana!Tu yang buat ambo kenang zamaeng budak-budak yang tak beysa ada masalah! Sokmo pong malaeng ghaya ambo dah rilek dah, paksae sumanya ambo dah sedia daghi siang lagi. Esok ni konong-konong nak bakik tido awae paksae nak gi semejek! Tu yang bahagia tuh! Taing-taing ni lae buleh dok bejupa dengaeng suma oghang kapong, paksae sebelong ni kae pakaek dok sebok belaka!Lepaeh semayang ghaya, kami pakaek gi kubo lae pulak.

Budak-budak lani, kalu maghi pong bukaeng nak makaeng sangat, dema lebeh ke nak duek ghaya, tapi ambo kata, kalu nak duek ghaya kena masok makaeng dulu. Uguk la konong!
Budak2 ni pulak demand sikik, dua tiga kupang macaeng dulu-dulu tak mboh deh, paling koman pong duek singgek. Tu lae zamaeng dah banyak sangaek beghubah! Macaeng ambo, dulu muda lani kho dok tua, mata pong kho dok ghabong, sakik lutuk sakik kaki.....heh...heh...heh...kesian ambo di...mulok jey dok kuat lagi!!!

Paksae apa pedeh mata ni? weiii....dah puko11.05 menek dah. Patok lae ambo ghasa mengatok. Ihh...ambo begheti di sini lae dih..lheing kali kita gebang lagi. Esok nak bakik awae, nak besao deh!
Daa... ambo begheti! Ahey kalam...Assalamualaikum. Maaf jika terkasar bahasa dan moga Ramadhan ini memberi ketenangan pada kita semua. Wasallam.

Sabtu, 5 September 2009

Ghaya ooooo ghaya (bahagian 1)

Assalamaualaikum.

Bejupa kita haghi ni. Ambo haghaek muma-muma suma dok sehat sokmo dalaeng bulaeng posa ni.Jaga kesehataeng muma, jaga peghange muma, jaga mulok lidah. kighanyae jaga sumalae haek Allah tak bagi buaek dih!

Haghi ni dah lima belaeh haghi dah kita dok posa. Kighanyae masa kho dok cepaek je. Arwah mak ambo kata kho dok tughong bukik lae. Lepaeh jey lima belaeh haghibulaeng memang kita ghasa kho dok dekaek, kho dok cepaek. Ghaya kho dok maghi lae!

Haghi ni kita gebang baek haghi ghaya di! Betuah badaeng dah sambok ghaya dekaek 49 tahong dah! Dulu dengaeng lani memang banyak sangat bezanyae. Heh...heh...heh.....!

Ambo ingaek lagi kalu dulu, semingung nak ghaya baghu lae mak ambo sebok nak buaek ko ghaya (kuih raya) Awae-awae lagi dok hipong telo ayaeng haek nak buaek ko tu! Dulu ghasa ambo tak dak dehdokbejuae telo macaeng lani. Tapi telo itek mak ambo beli jey, paksae kami tak bela itek.

Dulu tak dak ko banyak macaeng lani. Yang dok selalu ambo tengok dan mak ambo dok buaek, tu lae ko baka, buah hulu, putu kacang, ko loyang, ko cabe haek mak ambo selalu buaek lae. Ko cabe tu lebeh kughang macaeng ko tighaeng lani (kuih tiram), tapi boh penyelok (pencelup) kala meghah. Pagi-pagi lagi, lepaeh bakit besao(bersahur) tak tido dah kami. Mak ambo gogheng tepong, nak buaek ko baka, punya lae huli (uli) sape lenguh tangaeng paksae satgi tak puteh tak gebu... tu haek mak ambo dok ghoyaek.


Asaek bekelong penoh ghumah pong belong tetu jadi lagi. Ghumah ambo dulu ataek ghembia jey!
Bukaengnya ada oven macaeng lani. Baka pong dalaeng peghiok je. Ataeh tudung peghiok tu lae boh api daghi sabok nyo tu yang buaek asaek bekelong tuh! Baka pelengaek haek kali petama dengaeng kedua tu, habuaeng ambo je lae, paksae hangik, api tak beghapa buleh kontro lagi. Sedaek ke ambo lae! he...heh...heh!

Esok ni, mak ambo tak gi motong lagi, paksae nak wat ko buah hulu pulak. Pagi-pagi lagi mak keghah ambo sugho puko telo. Mak ambo wat buah hulu dengaeng telo itek. Mak ambo bagi pasu sebutey dengan tepaek timbok telo tu. Sape lani ambo dok sipaeng lagi dawey begelong-gelong
tu, ghasa macaeng baghang antik lae! Timbok telo kena tengah panaeh, paksal kalu dok tepaek tedoh, telo tak beghapa nak nheik. Tu kata mak ambo! bagey nak tecabuk tangaeng ambo dok timbok telo tu. Baka dua tiga pelengaek hangit jey. rezeki ambo deh!

Dua-dua ko haek ambo dok sebuk di atas tu, beghaek lae sikik buatan dia, kalu ko loyang kae, ko cabe kae, senang sikik mak ambo kata, tu selalu mak tak mitak tulong ambo, dia buat kenighi jey!

Haghi megang ghaya (oghang kapong Anak Kugho sebuk peseng tu) lagi lae sebok dan meghiah. Sebelong tu mak dah mitak tulong oghang ambik buloh lemang. Dulu buloh lemang tak kena dok beli, di Bukik Wang kae, dekaek kubo pong belambak, ambik jey, tak dak sapa nak maghah.

Tang nak besiaek buaek lemang tu yang cukok haghu tu. Ghumah dulu-dulu sumanya tinging-tinging, kighanyae gajah pong buleh masok tido bawah ghumah! Mak ambo selalu baka lemang bawah ghumah, paksae kalu di luar ghumah, takok hujaeng! Pagi-pagi lagi dah kena kuko nyo
(kukur kelapa) Kuko nyo kalu nak seghenok bayangkan nheik kuda! kah......kah....kah!
Masa mak ambo dok isi beghaeh pulok tu, jangaeng sapadia dok jalaeng meghejaeng kaki(hentak kaki) Suma persediaaeng buaek lemang tu mak ambo sedia di ataeh jemoghang! Senang mak ambo kata!

Siaek suma, hakok lae bawak tughung, letak pelaeng-pelaeng di galang tepaek haek nak baka tuh!Sapadia pong tak dok ataeh ghumah paksae asaek penoh!. Tapi... asaek-asaek pong, ada kebaikaengnya jugak. Nyamok takdak, nyamok pong takok pedih mata kok?

Kok kaki lima kedey, kok jalaeng, oghang dok bejuae beli daging. Ayaeng payah nak ada, selalu pong kalu ayaeng, haek bela senighi lae jadi korbaeng. Selalu dema dok semeleh lemung dengan
keghebo jey! Daging masa tu dok ada sekati 3.60 jey. Tapi kae dok ghasa mahae tak kigha dah. Masa tu duek pong susah nak dapaek.

Malaeng ghaya kae, ada haek dok maing meghieng buloh lae selalu pong. Kalu nak buaek pelita ghaya pula, mak ambo selalu gi tebang buloh aur panjang-panjang sedepa, mak koghek3 ke 4 lubang di buloh tu, ambik tali guni (dulu oghang pangge peseng tu, lani tak beysa ambo tengok) tepek seluk habuaeng nak boh sumung (sumbu) deh, gi beli minyak gaeh sekati dok ada sekupang tak silaek ambo, bila malaeng molek aeehhh plita ambo tu. Tak dak lae, lapu kelik-kelik macaeng lani!

Pagi ghaya, mak masak nasik dengaeng gogheng ikaeng kedegha maseng je. Makaeng nasik dulu baghu buleh makaeng benda lheing. Mak ambo kata 'satgi takok sakik peghok!' Lepaeh tu baghu lae makaeng benda lheing. Mak ambo selalu masak ghendang pedaeh keghang je! Nak beli daging tak beghapa cukok modae.Keghang baghu dok ada sekati sekupang, kalu beli 2 kati baghu dok ada lima belaeh duek. Nak makaeng daging gi ghumah oghang lae. Tapi mak ambo pesaeng makaeng sikik-sikik, kalu oghang bejamung (berjamu). Sape lani ambo dok ingaek pesan keghamat mak ambo tu! Ai mata jatoh dalaeng hati oooo!

Kita begheti di sini dulu lae di! Esok-esok kita begebang lagi. Haghi ni tak thu nak masak apa, anak ambo nak makaeng ko cagha (kuih cara) ambo ghasa nak makaeng badak beghendaeng, tak thu haek mana nak buaek, ghasa-ghasa undian jatoh kat anak ambo lae! heh...he...heh.....Tu lae sapa pong, anak mesti di dulukaeng, dema kaeng amanah daghi Allah, kena lae kita jaga molek-molek dih!

Pada anak comey kesayangaeng ambo dan pada anak-anak ghakaeng(rakan) tolan, Selasa ni, dema nak menghadapi UPSR, mak ucaekkaeng SELAMAT MENGHADAPI PEPERIKSAAN UPSR 2009' buat sehabis baik dan jangan lupa berdoa kepada Allah, moga semuanya dapat menjawab dengan penuh ketenangan dan mendapat keputusanYang CEMERLANG. Amin!
Related Posts Plugin for WordPress, Blogger...