ShareThis

Sabtu, 18 Julai 2009

ambo yang bernama chu mah - Museng deghian

Assalamualaikum.
Sebelong ambo nak meghipuk ni, ambo nak ucat tima kaseh la pada sapa-sapa yang dok hitey blog ambo nih! Kalu ikot hati, ambo nak tulih banyak2 riwayat hidok ambo ni tapi paksal ambo ni pakei ilmu pendinding (yang ambo kata ilmu pendinding tu la anak2 ambo dengan hasban ambo la) tu kena la gak brek-brek paksal dema kadang tu nak makaeng minung di! Jadi ambo kena lae tulih sikik sikik lae. Patok padaeng la kata oghang.

Haghi ni kita gebang bab museng deghian plak. Ni... ambo dok pikey museng pong dah ujong-ujong, jadi kita kosi ghame-ghame lae di kenangaeng dan kesah! Di Batu Kugho khasnya kapong ambo Anak Kugho (ambo ghoyak di Anak Kugho paksae ambo dok di sini) kesah deghian ni tak habih-habih. Kalu maghi je museng ni meghiah lae.

Sokmo pong kalu pokok macang bebunga, tu kae hat ada kebong ka, dusong ka pakat gi la languk2 pokok deghian. Mula-mula kigha bunga, kalu musing hujaeng ka, seghenok lae jugak paksal, bunga deghian kembang lae, tapi kalu kemagho kae, kecuk ghipuk lae bunga, napak gaya tak beghapa nak jadi lae deghian dema.

Tang menebaeh ni, kalu tuan tanah tu dah tua, dema upah lae oghang gi menebaeh, tapi kalu hat muda lagi tu, dema pulong senighi je. Oghang kita ni kalu hat ada dusong lae, bila deghian dah nak lughoh, pakat dok besembang lae kata ' weii.... deghian pong dah buang bughok dah!'Pa kita tanya, masa dok tengah jujuh kae, dema jawat hat tu lae. Kalu kita tanya lae lagi sekali selang semingung dua, dema kata pulak 'Weiii.... habih dah! masa dok jujuh dulu ghokpa tak kelik, ni ka buah dah hujong kae dah tak molek dah lae, buah pong makao (maksudnya yang keghaeh2 tu!)

Lani ni buah deghian memang mughah. Dulu ambo ingat, kalu mueng deghian je pagi-pagi lagi lori cina masok kapong. Lani dak dah. Kesian gak kat tuan deghian tu, muka pong moyok lae sikik. Satu lagi hat ambo nak cita, aghang kapong ambo tanaeng deghian bukaengnya di tanah2 pamah gitu, dema gi dok tanaeng di bukik. Bukit tinging-tinging pulak tu. Kata dema, kalu keghabat bukit tu, dagu dema tu dok belaga dengan pala lutuk la, Kesian dema.

Hakok-hakok tughung, tokey deghian beli mughah je. Tu belong lagi buah kapoh. Paghah lae kalu macaeng ni. Peloh sapey keting, duek tak dapat banyak mana pong! Tapi ambo memang puji dema ni, ghajeng,tak patah semangat gi jugak caghi deghian, nak sagha anak bini!

Dulu laing lae, dema dok ceghita, not lima ghinggit pong buat coh ghokok, beto kae saja nak tokok tambah tak thu lae pulak ambo. Kalu gi pekaeng Lasa (pekan Selasa) anak bini dema boghong sakaeng la. Ghasa nak beli apa, semua nya beli. duek banyak! Tapi ambo besa lae terjeghomoh dengan oghang banyak deghian nih. Sama-sama balek daghi pekan Lasa, sama2 pulak naik keta prebet sapuh, masa tu ghega tambang lima kupang, dia hulo duek singgit, tak ambik balek dah.
Kata budak2 lani keep the change. Bedoghong lae jugak ambo tengok dema duek bekepo-kepo!

Masa ambo tungung SPM dulu, ambo gi lae keja sat di KIB, keja kelang. Kawaeng2 dok mitak nak buah macang, di tepi ghumah ambo dulu ada pokok macang gelok, buah dia kae besa-besa.
Kalu nak bawak, bau dia satgi satu bas busuk, ambo pong bukuh dua tiga lapeh ngan sughat haba(surat khabar) wak gi kelang, tapi ambo kata lae gak kat dema ' wei... muma ni kae...di kapong ambo buat hataeng lemung (lembu) je!' Maghah dema kat ambo paksal dok pelece dema. Maghah kawaeng2 melawak dih!

Ambo ni suka gak sakat oghang. Pak Long ambo (Tok Imam Yahya) memang lae luaeh (luas) dusong dia (oghang kapong ambo kat bukik) Bila dia balek je daghi bukik, ambo pong tanya dia,gokpa buah deghian banyak lugho waktu malaeng, dia pong dengan sukacitanya jawaet kata, kalu maleng kaen sejok, tu lae buah deghian lughoh tu. Ambo pong bebatah lae dengan dia. ambo kata ' Dak lae.... buah deghian lughoh malaeng paksal dia gayat kalu siang dia napak tinging sangat, tapi kalu malaeng dia tak napak apa dah, tu lae dia lughoh malaeng tu!' Maghah Pak Long Yahya kat ambo. Dok napak lagi muka dia sapey la ni. kha...kah...kah....! Oghang bahgu balik bukik, ambo gi sakat macaeng tu. Tapi Pak long tak dak apa, ambo memang manja dengaeng dia.

Cakat bab museng buah ni, banyak sangat. Ambo ghasa sengae pinggang lae pulak. Dok lama sikik kae , betereng (veteran... beto kae ambo eja nih!) macaeng ambo ka ni lae akibatnye.
Nak buat maghak pinggang sat dih, satgi kita sambong le balik. Ambo nak gi ke dapo sat, nak tengok lae mana patok ambo buat, dema nak makaeng cuco ka, nak minung ai kopi kae?
Ambo begheti lae di sini, kita mengipuk satgi dih!!!!!

0 ulasan:

Catat Ulasan

Related Posts Plugin for WordPress, Blogger...