Assalamualaikum. Kita begebang lagi lae malaeng ni dih! Ghasa dah lama tak gebang, ghindu pulak ghasa dalaeng hati. Kita nak mula daghi mana hae! Haaa..... nih nak ghoyak sikik, kapong ambo letrek masuk lebih kurang ahey (akhir) tahong 1978 masa ambo dok tungung SPM. Malaeng petama ada letrek ghasa caghak (silau) pulak. he...he...heh... peghak deh....! Belong-belong tu kae gelaek gelemaek tak napak apa pong. Masa dulu bukaenya ada oghang pake tudung macaeng oghang la ni. kalu pake tudung kae...oghang loghaek dok tanya... wey... mu masok dakwah pa? Jadi masa tu ambo pong dok yengki lagi.Tocang dua tu lae trademark ambo. Sao ada letrek ka, ikat tocang salah kena lae. Hat heghok pong beto balik lae!

Paksae tak dak letrek lae, oghang kapong hat ada modal sikik tu beli TV pake generator. Ambo ingat lagi, lepaeh mengarek kae. ghame2 lae kami gi tengok ceghita Melayu, stat puko 8.00 malaeng, tu kae salah kena je semayang mengarek. Nu.. de... nak gi tengok TV nu... Ghumah sapa lagi kalu bukan ghumah Pak long Kria Awang Mehat( lani ni hat dok bawak van betapong tu, dia hakok budak sekolah) Gi ghumah dia kae, macaeng panggong wayang lae, paksal oghang ghame sungguh. Tang tu saja ada TV. Ambo masa tu omo 13 ke 14 macaeng tu lae.


Masok je, dema kutek duit soghang sekupang. Tengah dok sedaek tengok, kadang2 tu enjeng (generator) mapoh, weei.... ghiuh ghemang sogha dok besembang. Selalunya tengah dok sedaek tengok, berita pulak dah! Tu kae kigha dok caghi dinding lae nak menyanda. Tang berita ni, bukaenya nak tengok pong, tapi tungung habih je nak sambung ceghita Melayu balik.


Esok ni kae, geng kami buat ulasaeng la pulak hat kami dok tengok semalaeng tu. Bab buat ulasaeng memang semuanya ada bakat!

Ambo ingat dulu bukaengnya selalu ada kenoghi. Paling2 pong mak penakan ambo buat kenoghi maulud. Hat tu mak penakan ambo (Mak Long Minah bini Tok Imam Yahaya. Al-Fatihah buat dema) yang dok kontrek tiap tahong. Daghi petang dah kami gi ghumah dia. Bila malaeng je kae, plita gosleng kae dok begatong kat halang ghumah dua tiga butey, nak bagi ceghah de. Ada lae pulak tu tukang dok paeng(pam) anging bila pita gosleng tu napak malaek. Huh... meghiah sunggoh pong!

Kapong ambo dulu, kedey makaeng pong satu je. Tula kedey usok(lani ni tu la Kedai anak Usop tu) Mi dia memang sedaek, sepinggang baghu pat kupang. Aih (ais) pula beli aih kepae. Boh ai gula meghah capo ai sighaek (sirap) Dema sgat2 kae, jadi bulat macaeng bola, lepaeh tu kalu kami nak kae, kena gi caghi dong (daun) keladi tadah. Hui... sedaeknya ghasa. Ghega (harga) dia satu lima duek.

Uihh... dah mengatok dah ambo ni. Esok haghi Saektu (sabtu) tapi ambo kok mana pong kena bakit awael. Nak meghipuk banyak pong tak leh lae., kok esok tak sedar, kata oghang tido mapoh. Jadi ambo begheti di sini lae dulu, paksae esok ambo kena bakit nak buat cuco deghian, anak ambo nak beseghok esok. Ambo begheti di.... kalu nak denga lagi ceghita meghipuk ambo, muma kena lae ghajeng dok hitey blog ambo ni.. he...he...heh...