ShareThis

Isnin, 31 Ogos 2009

31 OGOS - Haghi Merdeka

Assalamualaikum.

Merdeka! Merdeka! Merdeka!
Tu lae kata-kata keghamaek yang ambo dok denga daghi dulu sapey la ni. Siaek gatong bendegha lagi! Bukaeng apa, cuma nak mengaja anak betapa bangganya dilahekaeng di Malaysia nan indah ni. Baley lae apapong, ambo tetaek kata kat anak-anak ambo bahawa ni lae negagha kita, apa-apa pong dan sejauh mana pong kita sapey, kita tetap anak Malaysia!

Bejupa lagi kita haghi ni dih! Lama ambo tak meghipuk, haghi ni ghasa ada masa sikik, ambo ghasa nak mengadaek benda alah ni. Bulaeng-bulaeng posa ni ghasa su'we (seram-seram sejuk) badaeng, sejak kebah daghi demaeng tu lae haek ambo dok ghasa selalu. Takpa lae di, ambo ni bila lama tak meghipuk pong ghindu jugak dalaeng hati nung!

Haghi ni kita ghoyaek hal medeka. Zaman ambo mengaji dulu, bila sapey je haghi medeka, cekgu suma dok loghaek buat petandingaeng, melukih, sapa-sapa haek pandey menyanyi dema menyanyi, baca rukunegara dan paling seghenok bila naik baeh gi pekan Tukogho , maknanya gi Sekolah Sunge Aka (SK Toh Sajak).

Ambo tak ingaek tahong bila, tapi haghi tu kami budak-budak cekgu sughoh pakey baju sekolah haek molek sikik paksal cekgu kata nak gi sekolah di pekaeng. Ambo mana ada baju molek, baju sekolah pong seley (sehelai) je. Balik sekolah je basuh sakaeng la baju, jemo cepaek2 paksal cekgu kata kalu baju koto bedamuh tak leh gi! Praeh (frust) ooo kalu tak leh gi!

Sebaek selalunya tak dak aktibiti apa kalu malaeng, ambo pong tido awae lae. Siaek pesan kat mak lagi sughoh geghak awae-awae takok telepaeh pulak. Kami ghame-ghame beghipong di sekolah Anak Kugho. Jenoh lae dok tungung, paksae gi awae sangat.

Baeh sapey puko tujoh lebih. Kalu ambo tak silaek , drebanya nama Wak oghang Ijok. Beghebok lae kami naik baeh paksal sumanya nak dok tepi tikaek. Peghak sunggoh!. Baeh tu kami gela dulu-dulu baeh israe (bas israel), mesti yang sewaktu dengan ambo, ingaek bas tu! Kala meghah dengaeng kuning ghasanya, ho lae Serekat Nothern Malaya punya! Heh...heh...heh.....!
Koseng keghaeh pong seghenok bukaeng maing!


Sapey je di Sekolah Sunge Aka, dah ghame budak-budak sekolah beghipong. Cekgu pong aghah kami masok barisaeng paksal dah nak belaghak. Tukang bawak bendegha Malaysia wake sekolah Anak Kugho masa tu, hat tinanya ambo dan hat jatannya Suhaimi, tua setahong daghi ambo, lani dia ni kegheja CC di Pejabat Tanah Dekghah Tepeng.

Ambo tak ingaek kami belaghak sapey kemana, tapi letih jugak lae dok usong bendegha tu. Yang ambo ingaek, ghame oghang dok bedighi di tepi jalaeng sambe pegang bendegha. Meghiah dan bersemangat sunggoh! Setengah tu dok bedighi kok kaki lima kedey. Kami pong ghasa seghenok dan megah lae! Tengahaghi kami pong balek. Daleng baeh ghiuh ghemang dok bukak temberang, ghoyat macaeng-macaeng, ho lae... klua pekaeng pong sekali sekala!

Kenangaeng tu ambo ingaek sapey lani. Sangat terpahat daleng ambo punya hati. Walopong ambo tak menang pertandingaeng melukih bendegha, tapi dapek lae gak hadiah saguhati. Jadilae di. Hadiahnya ambo dok ingaek lagi kala Luna haek ghega pat kupang lima duek tu! Megah ooo gi ambik hadiah. Kalu dapaek numbo satu, mengepak lagi lae ambo! heh...heh...heh.....!


Weiii.... dok ghalek mengipuk, tengok jaeng dah puko semilaeng lebih dah! Haghaek ka tak masak lae tengahaghi. Anak ambo pong sokghang dok study sokghang gi sekolah, ada kelaeh tambahan Matematik. Ghajeng cekgu dema ni. 8 haghibulaeng ni dia stat lae peksa UPSR. Abang dia pulak mula peksa percubaan, esok 1 September. Mujo lae gak anak-anak ambo ni ghajeng, tak loghaek nak sughoh baca buku. Alhamdulillah, paksal Allah anugerahkan kaek ambo anak-anak yang baik dan mendenga kata. Haghaek2 dema dapat yang terbaik lae, tu lae doa ambo selalu!

Ambo stok (stop) di sini lae wat kali ni, lhing kali ambo menghipuk balek di! assalamualaikum dan SELAMAT BERPUASA SERTA SELAMAT BERHARI RAYA' Moga Allah berkati hidup kita suma di dunia dan di akhirat jua. Daaaaa..........!

0 ulasan:

Catat Ulasan

Related Posts Plugin for WordPress, Blogger...