ShareThis

Selasa, 1 Disember 2009

Ghindunya ambo.....!

Alhamdulillah.
Bejupa lagi kita dih! Lama sunggoh lae kita tak bejupa. Ambo punya benda alah ni ada masalah, ambo pong dok sebok manjang, sapey tak daeng nak jengok-jengok muma dih!

Apa haba muma loni. Ambo haghaek muma sehat sokmo lae. Macaeng mana sambutaeng haghi ghaya tahong ni? Selalu pong kalu ghaya haji , tagha kita di sini, maksok ambo di kapong kita di Batu Kugho tak beghapa meghiah sangat lae. Cumanya kalu kita buat korban kae ada lae meghiah sikik, Tapi kok mana pong, di ghumah ambo tetaek lae meghiah, paksae anak-anak penakan buleh kata banyak haek kelek ke sini, ke ghumah ambo.

Mingung-mingung loni, dok kaluk makaeng kenoghi lae. Oghang tu madah kenoghi, oghang ni dok madah kenoghi. Kadang tu satu haghi bedeghek kenoghi. Kalu kuat kae, ghajeng sikik kae, muma jenoh hato kenoghi, ambo paling kuat takat tiga buah buleh lae. Lebih pada tu, pakey leteh hat-hat lae!

Adek beghadek ambo kelek kapong, dema tak loghat mana deh, ambo sedia jey beghaeh banyak-banyak. Caghi ikaeng maseng buat stok di ghumah, cabey mesti ada, ulaeng-ulaeng mesti ada, semua tu lae lauk kami sekelorga. Sedaek nak mapoh kalu dapaek makaeng lagu tu! Ghame-ghame pulak. Hui.... nekmatnya hanya Tuhan yang tahu!

Nih dah sunying kelek lae ghumah ambo. Abang ambo haek dok Joho pong dah kelek Joho lae. Anak dia haek baghu nak masok sekolah derjah satu , katanya ada tuisyeng.... Hui..... juling lae gak butey mata ambo, paksael budak kecik lagu tu pong cuti sekolah di isi dengaeng kelaeh tambahan. Oghang loni dih! masa tu mesti di isi dengan yang berpekdah (berfaedah) jey!

Ambo pong ghasa kagong (kagum) gak, anak dia baghu tadika dah buleh cakaek oghang putih. Membaca pong dah lajak jey. Hui, abang ambo tu jaga sunggoh lae anak dema. Ya lae dih.... sapa tak mboh bagi anak pandey kaeng? anak tu kaeng ke amanah daghi Allah. Beto dak?

Weeei! hujaeng pulak dah. Ambo kalu hujaeng jey mula lae pobia, takok nak ghetok benda alah
nih. Ambo begheti lae dulu dih. Satgi kita bejupa kelek dih. Lama tak begebang, banyak ni haek ambo nak ghoyaek! kih...kih...kih...! Daaaa......

Assalamualaikum


0 ulasan:

Catat Ulasan

Related Posts Plugin for WordPress, Blogger...