Dah lama ambo tak borak-borak manja dengan muma semua. Haghi ni 17hb, Disember 2010, bulaen teghahei dalam tahong 2010.

Ghokpa mata ambo ni daghi tadi dok tegedik-gedik? Arwah mak ambo kata, kalu mata dok tegedik-gedik, kita nak tengok oghang. Beto kae? Tu bukannya kepercayaan tapi kebetulan!

Puko 5.00 petang, hujan tughong, ambo tak buleh kelek lagi. Anak ambo talipong bagitahu

'Mak! kelek lae cepat, kawan mak maghi! Hui...sapa lae hat nak maghi ke ghumah ambo hujan-hujan lagu ni?

Ambo kelek dalam hujan, basah belosoh baju kahing ambo. Napak 3 oghang tetamu dok di berenda ghumah. Dua oghang ambo kenei, sokghang tu sapa dih?

Ghenung punya ghenung, ooooo! ghupanya kawan sekolah ambo dulu! Foziah Haji Sidek, tu lae kawan baik ambo daghi Tingkatan satu sapey Tingkatan 5 di Sekolah ToK Mudeng, Batu Kugho.

heh...heh...hehhhh! Tekejuk beghok ambo! Seghenok tak kata gena lae! Beghapa puluh tahong tak bejupa, haghi ni apa tuah, apa mipi, dia maghi jupa ambo!

Oghang tina ni kalu dah tua-tua lagu ni...kalu bejupa tak tanya natang penama lae....selaing tanya anak beghapa oghang, menatu beghapa oghang, cucu beghapa oghang. Gi Mekah kae dak lagi!

Nostalgia lama pong beputa kelek lae.... beceghita kesah lama.....kawan-kawan lama.

Hui! Seghenok sunggoh. Tima kaseh Foziah!