kau disiram bayu pagi

kehilangan mu terasa kini.....

Tiada dapat ku bayangkan.....

Sungguh mendayu-dayu suara mamat si penyanyi Kumpulan Exist......

7.1.2002. Tarikh yang sangat menyedihkan. Ambo hilang ibu ambo selama-lamanya.Dan tahong ni genap dah 8 tahong mak ambo gi...gi yang tak kan maghi kelek. uh..uhh...uhh......

Dalaeng ambo punya hati, tuhan saja yang tahu ghindunya ambo. Ghasa nak panggei mak macaeng oghang laing haek ada mak. Ambo memang tak beysa deh beghenggang dengan mak ambo, lepaeh menikah pong ambo tetap dengan mak. Tu janying ambo dengan soami ambo.

40 tahong tinggae dengan mak tak beysa ambo ghasa jemu ataupong bosan. Mak meninggae masa omo belio 86 tahong. Mak demam biasa jey mula tu. Tapi lepaeh tu mak jatoh, sebab mak pakey besi di paha, daghah mak dah blok dan dokto kata tak payah lae dok bedah kesian opah.

Kami panggei dokto maghi ke ghumah buat rawatan haghi-haghi, dan haghi-haghi jugaklae ghumah kami penuh dengan adik beghadek sahabat handey.

Masuk haghi ke empat, mak nazak dan meninggal pada puko 10.45 malam. Ambo terdudok, ghasa kehilangan haek amat sangat.Macamana hidok ambo lepaeh ni. Anak-anak ambo lagu mana. Anak ambo Aiman meghaung lae dia. Opah yang dia sayang, yang dia kaseh. Anak ambo haek kecik tepisat-pisat tak tahu apa ke benda.

Sapey loni mak selalu maghi dalaeng mipi ambo. Bila ghindu ambo tak buleh nak tahan, ambo akan buka baju mak, kain mak, selendang mak. Kasut mak pong, ambo dok sipang sapey loni, beg tangan mak pong lagu tu gak. Bila ambo ghasa ghindu ambo akan pelok kasut mak ambo, ambo ghasa ada bau mak di situ. Uhh...uhhh...uhh.. Tak beysa ambo ghasa jemu walopong dok dengan mak 40 tahong. Ambo tak beysa puas! Tu haek ambo ghasa....!

Pinggaeng nasik mak pong ambo sipang baik-baik. Lagu tu lae gak dengan cawan dan sudu haek mak. ambo taghoh dalaeng lemari molek-molek. Oghang tua dulu-dulu, dema makaeng nasih tak beysa deh tuka pinggaeng!

Dulu-dulu masa hayat mak ambo maseh ada, setiap petang Jumaat ambo akan keghat kuku mak. Petang pula ambo akan syampu ghambok mak. Patang mak kalu keghat kuku haghi laing.

Tu lae ghuting (rutin) ambo setiap mingung. Sapey loni ambo buleh ingat mana satu kuku mak ambo haek belapih, mana kuku haek tebelah. Sanggo (sanggul) ghambok mak jey ambo tak pandey, tu lae ambo selalu pujok mak 'Guting lae mak ooo ghambok mak ni...senang sikik' Tu lae dialog ambo bila syampu ghambok mak. Mak akan jawab' baleylae adek ooo, bukaengnya mitak makaeng!" Tu lae mak ambo.

Luahan ghasa kaseh ambo, beysa gak kua dalaeng sughaek haba (surat khabar). Dulu-dulu ambo ghajeng gak tulih-tulih hata gi masuk pepa (paper) loni malaeh dah! Banyak lagi kenangaeng ambo bersama mak ambo, susah senang, suka duka, tapi banyak nya deghita lae, paksae mak ambo oghang susah. Tapi mak buleh megah lae, paksae di haghi tua mak, anak-anak semua beghebok nak bela mak, tapi mak buleh gi sat jey ke ghumah adek beghadek haek laing, sebab mak suka dok kapong dengaeng ambo, lagi pula ghumah tu sangat mak sayang.

Semingung jey mak dok ghumah dema, mak mula besunguk (bersungut) " ihhhh...aku ni tido dah tiga kali hagi ni, tapi tak malam-malam jugak!" Dema haek laing akan senyung bila mak kata lagu tu, paksae mak dah ghasa nak kelek kapong!

Tu lae secalek kenangan bersama mak yang sangat ambo kaseh. Kehilangan mak mengaja ambo erti ghindu yang teramat sangat. Pada muma haek masih ada mak, jaga lae dengan penuh kaseh, mak takdak tolok banding, mak sanggop berkorban apa saja untok kita anak-anak yang dilaheykannya.

Takat ni lae untok haghi ni, bejupa lagi kita bila-bila masa daghi loni. Ambo ni kadang banyak kegheja tu lae tak dan nak begebang dengaeng muma. assalamualaikum.